مصر هى الأهرامات وأبو الهول والرقصات


غنى ريكو راحت عليكى يادنيا وراح زمن الشباب .. وبقيتى يادنيا ماشيه على الصقفه وع الصاجات
هزيها بالراحه بالراحه تفضلى على طول مرتاحه .. هزيها بشويش بشويش خلى الشعب يعيش ..
ودة كان شعار مهرجان الرقص الشرقى الثانى عشر واللى شارك فيه 48 دوله حضروا من بلادهم يرقصوا عندنا وكأن مصر فى حاجه لرقصات أو أننا عندنا أزمه فيهم .. ماشاء الله مصر بدل ماكانت بلد العلم والأيمان بقت بلدهم .. الكل بيرقص حتى الأفراح بقت عبارة عن وصلات رقص والعروسه والعريس اللى مايرقصوش يبقوا من كوكب تانى .. الراقصة اللولبيه دينا تقول أن الرقص بيجرى فى دم المصريين وكتر خيرها اثبتت بما لايدع للشك أن تاريخ الرقص الشرقى أقدم من تاريخ الحضارة الفرعونيه .. يعنى سيبك من الديانات ومن التاريخ ومن الحضارات كلها دة جه بعد الرقص .. الراقصه اللولبيه دينا قالت كمان أنها مبتكسبش من الرقص وانها لو صقعت حته أرض حتكسب أكتر وأن الرقص عندها هوايه وأنها بتنشر الرقص لأنها بتحبه .. ياسلام لو كل الناس عملوا زيها وحبوا شغلهم زيها وكانوا عملوا لكل مهنه مهرجان عالمى كدة .. وزى ماقدمت بدله رقص غاليه قوى للراقصات الفائزات .. كنا مثلا فى مجال الابتكار حققنا لمبتكر حلم حياته وعملنا له ابتكارة مشروع يفيدة ويفيد البلد .. الراقصه اللولبيه قالت كمان أن الفتيات فى سن السابعه بيرقصوا قبل الكبار .. وطبعا عندها حق وعلشان كدة أنا بقترح على أولياء الأمور علشان يحفزوا بناتهم على التفوق يوعدوهم بجايزة زى جايزة دينا ( بدله رقص ) مااحنا لازم نشجع هواياتهم وننميها وكمان لازم ندفع دم قلبنا علشان دينا تروح ترقص لهم فى المدارس ماهى القدوة والمثل وهى اللى اكتشفت اكتشافات ولا زاهر حواس سبق ليها وكمان لازم ننشر مقولاتها الشهيرة فى المدارس والنوادى زى مقولتها الجامده قوى مصر هى الاهرامات وأبو الهول والرقصات .. كمان دينا أكتشفت أن الرقص علاج لحالات مرضيه كثيرة وانه بيسهل الولادة .. هذة الأكتشافات من حق دينا علينا أن نسمى شارع بأسمها أو نرفع تمثال أبو الهول ونضع تمثال لها مكانه لأنها حتخلى كل الأسر سعيده وبدل نكد الأزواج ووجع القلب أديها رقص وأنت تروق على طول .. كمان دينا سبب فى زيادة دخل البلد زيها زى قناة السويس .. ليها حق دينا لايهمها نقض حد ولا يهمها المهاجمين للمهرجان اللى اتعمل على ارض الأزهر .. ماهى أصبحت ( عالمه ) كبيرة فى الاثار والصحه والسياحه والثقافه .. ويالا على الصقفه كله يرقص

  • Digg
  • Del.icio.us
  • StumbleUpon
  • Reddit
  • Twitter
  • RSS

21 Response to "مصر هى الأهرامات وأبو الهول والرقصات"

  1. Miss. Sosa says:
    8 يوليو 2008 في 4:18 ص

    راحت عليكى يادنيا وراح زمن الشهادات .. وبقيتى يادنيا ماشيه على الصقفه وع الصاجات

    كلام حكيم فعلا وكما قالت (العالمة) تينا -اللي افظع من سميرة موسى واشنع من ماري كورى - الرقص اعرق من ابو الهول وهرم خوفو .. ده حتى الفراعنه كانوا بيرقصوا وهم بيشيلوا حجارة الهرم , والشعب المصري المعاصر كله بيرقص رقصة الطير المدبوح وده التطور لرقصة البجع الملوح

    تحيــاتى

  2. محمد فاروق الشاذلى says:
    8 يوليو 2008 في 4:31 ص

    يجب أن نعترف أولاً أن مصر تغيرت كثيراً فى الربع قرن الذى مضى بفضل إجتهادات (الحزب الوطنى ورجاله).
    ثانياً يجب أن نعترف كذلك بأن مستقبل مصر أصبح يسير فى إتجاه مختلف عن كل دول العالم.
    وبناء على ما سبق لن تجد كلام الراقصة / دينا لم يخرج عن السياق العام السائد فى بلادنا الجميلة، وأنها قد بنت قناعاتها هذه بناء على هذه الأوضاع الجديدة التى تحيط بمصر المحروسة.
    لاتغضب يا أخى فدورة الزمن يجب أن تعود للإعتدال مرة أخرى مهما تأخر معدل دورانها.

  3. محمد الهادى غانم says:
    8 يوليو 2008 في 5:35 ص

    اولا احب ان اعتذر لك اخي طارق لعدم تواصلي معاك بس ظروف والله .
    انا مش معاك في اللي انت بتقوله ازاي بتغلط في الفن والفنانين احنا بلاد يقوم اقتصادها علي السياحه وعلي مايبدو انت ما أخدش بالك من الاعلانات اللي كانت بتيجي عن السياحه في مصر الهارامات والبرج والراقصات طبعا هو ده الدخل القومي امال ايه وانت بتألس علي دينا الفنانه العظيمة يسرا كانت عامله فيلم اسمه بحب الرقص باين سألوها قالت انا بادعوا في الفيلم للرقص عشان كل واحد يعبر عن اللي جواه انا مش عارف بصراحه احنا بقينا ايه مش عارف عمي والا صم والا احنا ايه .
    تسلم ايدك ويجعله عامر

  4. kochia says:
    8 يوليو 2008 في 5:45 ص

    بقيتى يادنيا ماشيه على الصقفه وع الصاجات

    الديانات ومن التاريخ ومن الحضارات كلها دة جه بعد الرقص

    مصر هى الاهرامات وأبو الهول والرقصات

    حاسة ان النهاردة جمعت معلومات جديدة حلوة اوي
    الظاهر لازم اتعلم شوية حاجات جديدة عشان اعرف اللي معرفوش
    اتعلم الرقص طبعا !!!!!
    ويارب الحق جايزة

    دنيـــــــا
    الامر لله

    تحياتي

  5. غير معرف Says:
    8 يوليو 2008 في 3:35 م

    مررت لاقول لك وراك وراك ولو رحت فين


    تحياتي

  6. Mohamed Dawod says:
    8 يوليو 2008 في 8:22 م

    يا سلام يا جدعان....بقى مصر اللى خرجت زمان علماء وادباء واطباء وشيوخ ومقرئين للقرأن خرجت فى الاخر دينا....بقى مصر اللى صدرت للعالم العربى كله مدرسين يعلموا ولادهم وأئمه يؤموهم فى صلاتهم فى الاخر تعملهم مهرجان رقص شرقى....ليهم حق بقى العرب يفتكروا ان مصر خلاص معدش فيها غير حشيش ورقص.....من كام يوم واحد عربى بيقوللى انا والله عاوز اسافر مصر الصيف ده....بسأله ليه وانا متوقع يقولى علشان اشوف المتحف المصرى ولا اروح اصلى فى الأزهر لقيته بيقولى علشان اجرب الحشيش واشوف رقصه حلوه....منهم لله اللى عملوا فينا كده بحجة السياحه ودخل السياحه يلعن أبو السياحه بالشكل ده.....تحياتى للبوست وشكرا

  7. رؤية says:
    9 يوليو 2008 في 9:15 م

    كمان دينا أكتشفت أن الرقص علاج لحالات مرضيه كثيرة وانه بيسهل الولادة .. هذة الأكتشافات من حق دينا علينا أن نسمى شارع بأسمها أو نرفع تمثال أبو الهول ونضع تمثال لها مكانه لأنها حتخلى كل الأسر سعيده وبدل نكد الأزواج ووجع القلب أديها رقص وأنت تروق على طول .. كمان دينا سبب فى زيادة دخل البلد زيها زى قناة السويس .. ليها حق دينا لايهمها نقض حد ولا يهمها المهاجمين للمهرجان اللى اتعمل على ارض الأزهر .. ماهى أصبحت ( عالمه ) كبيرة فى الاثار والصحه والسياحه والثقافه .. ويالا على الصقفه كله يرقص.....

    قليل التمثال عليها....
    مش اقل من براءة اختراع وجايزة الدولة التقديرية....
    وخلى الشعب يعيش!!!!!!!!!

  8. dina says:
    10 يوليو 2008 في 4:02 م

    اول مرة احس ان ريكو فنان الشعب و بيعبر عن حاله المنيل...سمعت انا عن موضوع مهرجان الرقص دا ... بس خلاص بعد ما بقت الراقصات بتحيى حفلات التخرج و بعد ما لقوا الحل فى تطوير التعليم هو هز وسط البلد مبقتش استبعد حاجة

  9. رؤية says:
    10 يوليو 2008 في 11:44 م

    استاذ طارق طبعا انا علقت على الموضوع قبل كدا،
    بس عاوزة اقول لحضرتك انك ليك واجب عندى فى المدونة ياريت تاخده وتجاوب عليه.

  10. أنا حر says:
    11 يوليو 2008 في 5:38 ص

    ينارمز من رموز مصر ماينفعش نهاجمها لأنها نحافظة على ترتيبنا العالمي في اتحاد الرقص الشرقي ومخليانا المركز الاول على العالم
    ربنا يديها الصحة ويخليها تقدر تحافظ على المركز ده ونقدر ناخد ميدالية في كاس عالم الرقص الشرقي
    تحياتي

  11. Unknown says:
    13 يوليو 2008 في 11:53 م

    اولا ازيك
    عامل اية يارب تكون بخير
    ثانيا استوقفنى جداا حكاية مدونات بورسعيدية !!! طيب انا فين ؟؟
    انا زعلت :(

    اه بوستك مؤلم جدا على فكرة لكن اقول اية ثقافة هز الوسط
    والبحث عن المال دون تفكير فى مصدرة
    شهادات اية فى زمن الراقصة فيه اشهر من الوزير واغنى ؟
    وحتى اهم من علمائنا اللى طفشوا خارج مصر بحث عن الاحترام وقوت اولادهم

    بس دا كمان من تأثير الانفتاح
    الاقتصادى
    احترامى

  12. dina seliman says:
    14 يوليو 2008 في 9:01 ص

    استاذ طارق
    ايه الغيبه دى كلها
    افتقد مرورك

    لقد تركت تعليقى على مكتوب
    واكررها ان ما يحدث هذا بدايه للموات الثقافى التام
    ولنا الله
    دمت بكل الخير

  13. blue-wave says:
    14 يوليو 2008 في 5:17 م

    سمعت عنك كثيرا سيدى
    لكن ما لمسته اليوم يفوق اى كلام
    تحياتى بالفعل

  14. قوس قزح says:
    15 يوليو 2008 في 9:17 ص

    اللى اختشوا ماتوا

    احب ابلغك ان بمشيئة الله تعالي سوف يكون لقاء مدوني بورسعيد في السابعة مساءا يوم الخميس
    بمركز شباب استاد بورسعيد الباب الجانبي
    المطل علي شارع الأمين أما بيوت الشباب
    و الدعوة مفتوحة لكل من يود المشاركة

    اتمنى نشوفك هناك

    تحياتى

  15. YaQeeN says:
    15 يوليو 2008 في 12:05 م

    لا إله إلا الله ولا حول ولا قوه الا بالله العلى العظيم..
    بجد والله..

    يعنى بيعملوا مهرجانات للرقص ؟
    يا ماشاء الله..
    وطبعاً بيصرفوا على الحاجات دى ألوفات مؤلفه..أقصد ملايين..

    ده بدل ما يشغلوا الشباب العاطل..
    أو يصرفوا على الغلابه..وللا يتبنوا أى مؤسسه خيريه..

    مصر دى بتفهم..كل يوم عن يوم الايام بتثبتلى ان مصر دى بتفهمممممممم..!!!!!


    تقبل تحياتى ومرورى..

  16. Empress appy says:
    15 يوليو 2008 في 11:02 م

    بص بص او سمحت الرقص مش وحش والله
    بس عيب يعنى فى الشارع وبعدين مين قال ان مصر راقصات
    طيب دول مستوردينهم بس ركز انت كده هتلاقيهم جنسيات تانيه هههههههههه

  17. أم أحمد المصرية says:
    16 يوليو 2008 في 12:57 ص

    اخي العزيز
    اولا كيف احوالك
    ثانيا يظهر اني كنت مشغولة لدرجة اني لم اسمع عن المهرجان ده مش كنت تنبهني عشان اخلي بناتي يشتركوا تنفيذا لمقوله العالمة الكبيرة دينا
    رحم الله المتنبي
    كم ذا بمصر من المضحكات
    و لكنه ضحك كالبكا

    حسبنا الله و نعم الوكيل

  18. yasmina says:
    16 يوليو 2008 في 2:07 م

    سبحان الله
    كل شيء في هذه الدنيا غريب
    ولست تدري من اين تاتي التقليعات الغريبة
    والمقبولة للاسف اكثر من ما هو مفيد او صحيح بحياتنا

    تحياتي

  19. gigi says:
    16 يوليو 2008 في 4:37 م

    ربنا يرحمنا بوست جميل
    وهنعمل ايه ربنا يستر على الجيل اللى جاى

  20. موناليزا says:
    17 يوليو 2008 في 2:34 م

    لاحول ولا قوة الا بالله
    اللهم لاتؤاخذنا بما فعل السفهاء منا
    الخوف يا استاذ طارق لحد يقرا كلامك ويفكروا بجد ويسموا شارع باسمها

  21. السهم المكسور says:
    18 يوليو 2008 في 2:07 م

    علي فكره موضوعاتك غايه في الروعه
    ولقد قرأت مدوناتك واعجبت بها كثيرا وارغب في تبادل الروابط معك
    وشكرا لو وافقت