البطه


المشهد الأول
الزوج .. كل سنه وأنتي طيبه يا حبيبتي فاضل كم يوم على رمضان
الزوجة .. وأنت طيب الأيام جرت بسرعة
الزوج .. هي دى سنه الحياة .. ربنا يعود الأيام علينا بالخير
الزوجة .. عاو زينك تجيب لنا بطه أنت عارف دة موسم وبور سعيد كلها متعودة تأكل أول يوم بط
الزوج .. البط غالى السنه دة قوى وبعدين عاو زين نغير العادة دى .. دى لا هي سنه ولا في الكتاب
الزوجة .. بس دة موسم واحنا أتعودنا على كدة
الزوج .. حاضر ياستى حجيب البطة
الزوجة .. أنا مقلتش لك .. اصل أنا عزمت أمي معانا اول يوم رمضان خليهم بقى بطتين
الزوج .. يعنى ماقولتيش .. مش قبل متعزميهم تقو ليلى
الزوجة .. أنا عارفة انك طيب وكريم ومش حتقول حاجه
الزوج .. أمري لله حاضر
الزوجة .. بس تفتكر البطتين حيكفونا اصل أمي حتيجى ومعاها أخواتي البنات خليهم ثلاثة
الزوج .. حرام عليكى .. أجيب فلوس منين للعز ومه دى .. والله ماانا جايب بط لو عاو زه تعزميهم يبقى على فراخ
الزوجة .. لا بط هو إحنا مش زي الناس ولا إيه
الزوج .. ما لناش دعوة بحد .. والله ماانا جايب بط
الزوجة .. طيب والله ماانا قاعدا لك في البيت .. يالا ياولاد نروح لستكم يالا

@@@@@@@@@@@@@@@@@@@@@@@@@@@

المشهد الثاني
أم الزوجة .. شفت بنتك جايه غضبانة من جوزها
الأب .. أكيد بنتك غلطانة .. دلوقت اتصل بجوزها وأشوف الموضوع
أم الزوجة ..لا لا تتصل بيه ولا تكلمه أنت حترخص بنتك ولا إيه
الأب .. لا ياستى مش برخصها بس غلط تسيب بيتها بالطريقة دى
أم الزوجة .. لا حتقعد معززة مكرمه لغاية ما يعرف قيمتها
الأب .. حاضر اللي تشوفيه
أم الزوجة .. هات لنا بط بقى عشان اول يوم رمضان
الأب .. أنتي عارفة أن الدكتور منعني من أكل البط وحكون صايم مش لازم بط ياستى
أم الزوجة .. لا لازم بط .. أنت تجيب لنفسك أي حاجه تانيه جنب البط
الأب .. حاضر
أم الزوجة .. اعمل حسابك عشان حنعزم كل أولادنا وزوجاتهم يعنى عاو زين ست بطات
الزوج .. إيه ؟ أنتي عارفة الست بطات بكام ؟ دول بمرتب الشهر
أم الزوجة .. ملناش دعوة .. ده موسم والمفروض تعمل حسابك
الزوج .. واللي ممعهوش
أم الزوجة .. يتصرف
الزوج .. بقولك ممعيش
أم الزوجة .. ياسيدى أتصرف
الزوج .. بقولك إيه أنا سيبلك البيت وماشى أنتي ارهقتينى بمطالبك وخلتينى استلف من طوب الارض معندش قادر استحمل
ويترك الزوج البيت لزوجته

@@@@@@@@@@@@@@@@@@@@@@@@@@@@@@@

المشهد الثالث
أول أيام رمضان
أم الزوجة .. المغرب آذن .. كل سنه وأنتي طيبه يابنتى سمى بالله وكلى
الزوجة .. وأنتي طيبه ياماما
أم الزوجة .. مبتكليش ليه
الزوجة .. مليش نفس أكل من غير جوزي
أم الزوجة .. متفكرنيش بقى دى اول رمضان يعدى عليه وابوكى مش معايا
الزوجة .. كلوا ياولاد ستكم عامله البطه علشانكو
الأولاد .. واحنا كمان ياماما ملناش نفس ناكل
الزوجة .. ماما أنا جوزي وحشني أنا مروحة لبيتي
أم الزوجة .. والبطة
الزوجة .. أديها لحد مسكين .. يالا ياولاد نروح بيتنا
أم الزوجة .. وأنا كمان ما ليش نفس اكل من البطه دى أنا راحه اتصل بأبوكى اترجاه يرجع
جرس الباب يرن .. تفتح أم الزوجة
مسكين .. لله يا حاجه
تدخل أم الزوجة تلف البطه وتعطيها للمسكين
ثم تدخل تتصل بالزوج .. تعالى محتاجاك .. مش عاوزين بط

  • Digg
  • Del.icio.us
  • StumbleUpon
  • Reddit
  • Twitter
  • RSS

32 Response to "البطه"

  1. همس الاحباب says:
    1 سبتمبر 2008 7:55 ص

    كل سنة وحضرتك بخير
    اللهم تقبل منا ومنكم صالح الاعمال
    ورمضان كريم

  2. همس الاحباب says:
    1 سبتمبر 2008 7:56 ص

    ههههههه
    دى ما كانتش بطة يا جدع
    بس حلوة يعنى انا لو جيت عندك بورسعيد اول يوم انتعزم على بطة
    كويس علشان اجى اخر يوم
    ههههههههه
    تسلم ايدك اخى الكريم

  3. نهر الحب says:
    1 سبتمبر 2008 11:52 ص

    أ/ طارق
    كل عام وانت بخير
    ورمضان كريم وبدون بط ههههههه
    سبحان الله بعد الخناقة والغضب رجعت الزوجة الى قواعدها سالمة
    ادام الله على نساء الاسلام عقولهم

  4. khaled says:
    1 سبتمبر 2008 1:00 م

    بصراحه احيانا الزوجات بزودوها خالص
    وكانو الزوج بنك مركزى حاضر لكل الطلبات
    تتاكد من الميزانيه بالاول قبل ما تعزم التتار
    وعلى قد لحافك مد رجليك

    كن بخير دائما
    وكل عام وانت بالف خير
    تحياتى واحترامى

  5. زُمُرده says:
    1 سبتمبر 2008 5:28 م

    كل سنه وانت طيب ولله اقرب وعلى طاعته ادوم
    وبخير وسعاده

  6. نهر الحب says:
    1 سبتمبر 2008 7:26 م

    أسأل الله الذي لن تطيب الدنيا إلا بذكره
    ولن تطيب الآخرة إلا بعفوه
    ولن تطيب الجنة إلا برؤيته
    أن يديم ثباتك ويقوي إيمانك وصحتك
    ويرفع قدرك ويشرح صدرك
    ويسهل خطاك لدروب الجنة
    وأن يجعلك من عتقائه من النار
    ومبروك عليك شهر رمضان

  7. appy says:
    2 سبتمبر 2008 12:13 ص

    كل سنه وانت طيب
    وكل ده بسبب بطه ايه قصه البط اللى عامل ازمه اول يوم رمضان ده

    ه اليوم العالمى للبط فى الدنيا كلها ولا ايه

  8. قلب مصرى says:
    2 سبتمبر 2008 1:40 ص

    فليسقط البط وتحيا السعادة الزوجية.
    كل رمضان وانت بخير

  9. وومن says:
    2 سبتمبر 2008 5:47 ص

    كل سنة وانت طيب

    ماله بقي البط مزعلك في ايه ما احنا عندنا في البيت برضة بنفتتح رمضان بالبط

    وعموما نا فعلا معاك مش ضروري البط مالها الفراخ

    تحياتي

  10. Habiba says:
    2 سبتمبر 2008 1:30 م

    استاذ طارق
    السلام عليكم
    لقيت حضرتك ماجيتش تقلى كل سنه وانتى طيبه قلت اجى انا

    كل سنه وحضرتك بخير
    ورمضان كريم

    اولا بقى هو حكايه البط اول يوم دى بجد عنكوا لازم؟؟؟

    ثانيا سؤال ام الزوجه جابت البط منين لما الراجل سابلها البيت وطفش ؟؟ههههه


    ثالثا بقى برافو بجد حضرتك صغت الموضوع كويس علشان تصل للهدف اللى وراه بطريقه جميله من غير لا نصايح لا مواعظ

    النهايه كانت فيها الخلاصه بجد اكثر من جميله

    ربنا يبارك فيك يسعد قلبك وادعيلى

    جزاكم الله خيرا بقالى فترة ماضحكتش

  11. ماما أمولة says:
    2 سبتمبر 2008 2:58 م

    هههههههههههههههههههههههههه
    ماكان من الاول
    يالا علشان يعرفوا قيمة ازواجهم
    كل عام وانت بخير

  12. رندا says:
    2 سبتمبر 2008 4:38 م

    كل عام وحضرتك بالف خير

    وتكون من القائلين والمقبولين


    اَللّهُمَّ اجعَلني فيهِ مِنَ المُستَغْفِرينَ، وَ اجعَلني فيهِ مِن عِبادِكَ
    الصّالحينَ القانِتينَ، وَ اجعَلني فيهِ مِن اَوْليائِكَ المُقَرَّبينَ،
    بِرَأفَتِكَ يا اَرحَمَ الرّاحمينَ .


    اَللّهُمَّ ارْزُقْني فيهِ طاعةَ الخاشعينَ،
    وَ اشْرَحْ فيهِ صَدري
    بِانابَةِ المُخْبِتينَ، بِأمانِكَ ياأمانَ الخائفينَ .


    تقبل الله منك صالح الاعمال

    رندا

  13. رؤية says:
    3 سبتمبر 2008 2:22 ص

    ^_^

    طيب ما كان من الاول...!!،

    كل سنة وحضرتك طيب،

    تحياتى لك.

  14. بنت سيناء says:
    3 سبتمبر 2008 5:00 ص

    اول زيارة؛؛كل عام وانت طيب
    بس هو صحيح عندكو فى بورسعيد اول يوم لازم بط؟؟ والله تمام
    اشفقت على الازواج من ارتفاع اسعار البط اولا؛؛ومن زوجاتهم العاندات ثانيا
    تحياتى لك بس والله شوقتنى للبط

  15. بنت سيناء says:
    3 سبتمبر 2008 5:01 ص

    شيل صورة البط لحسن افطر

  16. كيارا says:
    3 سبتمبر 2008 11:08 ص

    ههههههههههههه

    ماكان من الاول

    لازم يعني يرهقوا الراجل

    كل سنه وانت طيب

  17. غير معرف Says:
    3 سبتمبر 2008 2:04 م

    في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    http://www.ouregypt.us/culture/main.html

  18. قهوة بالفانيليا - شيماء علي says:
    3 سبتمبر 2008 2:14 م

    وحشتني بورسعيد بجد ..
    فعلا البط في بورسعيد مقدس :)
    مش فاهمة ايه سر البط في بورسعيد اول يوم .. :)
    ياااااااااه
    قد ايه بورسعيد جميلة ..
    و قد ايه هي واحشاني ..
    :)
    كل سنة و انت طيب يا استاذ طارق :)

  19. tote says:
    3 سبتمبر 2008 3:50 م

    السلام عليكم
    رمضان مبارك وكل عام وانت بخير
    بجد جميلة جدا القصة هايلة وفى الاخر مش كلوا البطة سبحان الله فعلا
    تقبل مرورى
    رمضان مبارك

  20. Mohamed Dawod says:
    3 سبتمبر 2008 4:04 م

    كل سنه وانت طيب يا أخ طارق.....اعلنها عاليه صريحه مدويه....انا السنه دى ولأول مره بعد 32 سنه هى عمرى كله....اكلت فرخه اول يوم رمضان لانى معرفتش اجيب هنا فى الغربه البط المرجان الأصلى اللى كانت والدتى بتأمنه لكل بيت من بيوت ولادها قبل رمضان.....وبرغم انى كنت بضحك واستهزىء من عادة البطه اول يوم رمضان بس تصدق يا أخ طارق مطلعتش وحشه قوى. طلع برضه طعم البط اول يوم رمضان لذيذ بس مش لازم يوصل لدرجة هجر مسكن الزوجيه.....كل سنه وانت طيب ورمضان كريم

  21. ايوية says:
    4 سبتمبر 2008 1:56 ص

    واللة فى فى مجتمعنا فعلا حجات كتير لازم تتغير وعلى راى صباح رمضان قال وحدوة مقالشى لازم المكسرات والياميش والبط والاكل المبالغ فية نسينا حكمة الصوم وحكمة شهر رمضان تحياتى

  22. بحب كل الناس says:
    4 سبتمبر 2008 4:54 ص

    كل عام وحضرتك بخير
    وحقيقى القصة شيقة جدا

    وممتازة

    دمت بكل ود و حب

  23. norahaty says:
    4 سبتمبر 2008 8:29 م

    السلام عليكم ورحمة الله وبركاته
    حاقولك مثل ما قالوا اللى قبلى
    ما كان من الاول لكن يظهر احنا ما نتعلم الا بالدروس العملية ,ايوة رمضان يحب اللمة والصحبة ولكن (لا يكلف الله نفسآ الا وسعها )يعنى 3بطات!!
    صعب على موظف (عفيف اليد) فى الوقت الحالى .ربنا يسترها ويحلها من عنده.
    كل لحظة وانت بخير وبلاها بط خاااااالص.

  24. Desert cat says:
    5 سبتمبر 2008 6:34 ص

    طيب كانو جم خدوا البطة اللى عندنا بدل الغلبة دى
    اهى جت من نصيب المسكين اللى تقريبا قلبه حس بمشاكل بسبب البطة قال يخلصهم منها علشان كل واحده ترجع لجوزها بقى
    كل سنة وحضرتك طيب

  25. shasha says:
    5 سبتمبر 2008 4:12 م

    بوست جامد فعلا ومش عارفة ايه موضوع البط ده اول يوم تحياتى وكل سنة وانت طيب

  26. عايزه اتطلق و says:
    6 سبتمبر 2008 9:06 ص

    الله يا استاذ طارق ...
    خلو البطه دى عندى احنا فى الشرقيه البط اكتر من عدد البنئدمين..الموضوع تحفه فعلا وفعلا فيه ستات بترهق ازواجهم بكتر المطالب مع انهم مدركين دخلهم كويس وفين ستات تانيه زى جداتنا وامهاتنا زمان مبيحملوش ازواجهم فوق طاقتهم اليى هما عارفينهم ..
    بس برضو شوف فى الاخر مكبروش وعرفوا ان مش البط كل حاجه فى الدنيا وان مش عشان بطه اسيب راجل ...
    البوست اكتر من رائع وكل رمضان وحضرتك بكل خير وبرسعيد كلها منوره باهلها ان شاء الله...

  27. غير معرف Says:
    6 سبتمبر 2008 3:59 م

    أخي طارق
    أولا رمضان كريم عليك وعلى أسرتك الكريمة وعلى زوارك الكرام،موضوع جميل جدا ربما قد يبدو بسيطا لكنه في الحقيقة يصور جزءا من حياة الكثير من الأسر التي تختلق المشاكل من فراغ،فالبطة ليست إلا سبب فجر ما بجعبة كل طرف رغم أن السبب الحقيقي هو العناد وعدم الإحساس بالآخر وبمراعات ظروفه ،بسبب العناد تركت الزوجة زوحها وبسبب نفس البطة ترك والد الزوجة بيت الزوجية وفي النهاية كانت البطة من نصيب المساكين .
    في الحقيقة لقد أصبحت اخي طارق محللا إجتماعيا اتمنى ان تتحفنا دائما بالجديد فمواضيعك فعلا جميلة دون مبالغة

  28. dodda says:
    6 سبتمبر 2008 4:37 م

    انا مش عارفه اقول ايه؟؟
    اول مره اعرف ان البط مهم اوى فى بورسعيد كده..
    قصه مفيده اقليميا...
    هههه


    رمضان مش للأكل رمضان شهر الصيام
    افلا تعقلون
    والا ساعة البطون ؟؟

    كل سنه وانت طيب

  29. د. موني says:
    6 سبتمبر 2008 7:46 م

    كيفك انت؟؟؟
    الاغنية دي انا بموت فيها اولا طبعا لانها من فيروز وثانيا لانها شجية جدااا ومن افضل الاغنيات عندي
    انا اسفة دخلت كده على طول في كلام عن الاغنيى بس انا اول ماسمعت اولها زاد احترامى لحضرتك
    بالنسبة للبوست فهو هايل وبينقل واقع فعلا قليل اللى عرف يغيره فى بيته وكمان اسلوب حضرتك ممتع وراقى
    تقبل مرورى واحترامى
    ورمضان كريم

  30. ابن الإخوان والأزهر says:
    6 سبتمبر 2008 9:29 م

    بسم الله ما شاء الله

    أسلوبك جميل

    أنا بقى كنت معزوم أول يوم عند عمتي

    هذه عمتي فليريني أحدكم عمته

  31. ضى القمر says:
    7 سبتمبر 2008 5:37 ص

    ههههههههه

    كل ده بسبب البط .. لما اهل بورسعيد بقروا قصتك دى هيمنعوه أول يوم بأمر من الحكومه.. هههههه

    لكن لو جينا للجد ..
    فى عادات كثير بنعملها فى حياتنا حتى لو فيها ثقل مادى علينا .. لكن بنتمسك بيها .. بالرغم من ان كل واحد فينا ادرى بظروفه وبحياته .. يبقى كل واحد يكيف عاداته بنفسه .. مش يقبلها لأنها فرضت عليها .

    من رأيى أن كل بيت يعتبر ممكله خاصه ليها عاداتها وتقاليها الخاصه اللى تريح أفرادها وبس

    أخى طارق

    أبعدت فى قصتك .. وخاصه فى الحكم اللى فيها بين السطور

    شكرا لك يا اخى

  32. ميرام says:
    12 سبتمبر 2008 4:36 ص

    السلام عليكم ورحمة الله وبركاته
    بعتذر عن تقصيري ..


    حلو قوي الحوار ده ..
    انا اول مرة اعرف موضوع البط ده (:
    كل سنة وحضرتك طيب